Cyber World

Durante e añanan reciente, tabatin un revolucion den mundo di comunicacion y riba tereno di media social. Generalmente, comunicacion entre hoben y tambe entre adulto a cambia drasticamente den e ultimo 10 añanan. Media social, tabatin un impacto fuerte riba henter e cultura di hubentud. Un porcion grandi di hoben riba edad di 12 aña y mas jong ainda, awo tin un ‘Smartphone’ y ta comunica via media social, manera Whatsapp, Facebook, Twitter y Instagram.

E desaroyo global aki tambe tin un impacto fuerte na Aruba. Mucha y hoben por yega hopi lihe na informacion y servicio cu djis un click riba nan ‘mouse’. Tur e desaroyonan tecnologico aki, ta duna e muchanan y e hobennan e oportunidad pa siña cos y hende nobo, for di hopi leu. Generalmente ta uza media social pa cos positivo. Sinembargo, mucha y hoben mester ta consciente tambe di e potencial peligernan y e riesgonan cu uzo di media social por trece cu ne. ‘Sexting’ (mensahe sexual), termento cibernetico, ‘grooming’ (accion di pedofil pa atrae un mucha), pornografia di mucha, ‘catfish’ (lok/atrae mucha/hoben gañado nan), por ta peligroso pa e desaroyo di e mucha/hoben.

Cada ken tin su mesun parti di responsabilidad den esaki. Esun cu ta provee Internet, mayor, docente y e muchanan/hobennan mes. Ademas di charla pa mucha y hoben, Fundacion Telefon pa Hubentud Aruba, a desaroya un tayer pa docente, di con pa anda cu media social, mundo cibernetico. A traves di e tayer di ‘Cyber World’, Fundacion Telefon pa Hubentud Aruba, ta trata di duna e docentenan e instrumentonan pa nan por identifica cierto comportacion mas lihe. E docentenan por haci uzo di e informacion ricibi durante e tayer pa mehora e clima di siñamento na scol y pa pone limite riba comportacion desvia di e alumnonan.