Loverboys

‘Loverboys’ ta e mucha hombernan cu ta purba atrae e mucha muhenan pa bay den prostitucion. E ‘loverboy’ ta sigura su mes cu e mucha muhe ta namora di dje door di duna e mucha muhe hopi atencion y regalo. Specialmente mucha muhe vulnerabel ta sensitivo pa esaki y kier haci tur cos pa nan ‘guy’. Esaki ta crea un relacion di dependencia. E ora nan ta convence e mucha muhe pa tene relacion sexual cu otro hende pa placa. Na un forma desvia nan ta hinca e mucha muhe den prostitucion. A proposito, no ta djis mucha homber of homber ta haci esaki. Incidentalmente… mucha muhe tambe ta recruta ‘amiga’. Un ‘loverboy’ ta un criminal.

Con e ‘loverboy’ ta traha

E ‘loverboy’ ta busca un mucha muhe cu ta emocionalmente instabil of insigur. Esaki hopi biaha ta pasa via Internet; esaki nan ta yama ‘grooming’ (lok). E ‘loverboy’ ta cariñoso, e ta cumpra regalo, ta elogia y e ta duna e mucha muhe compliment. E ta duna e mucha muhe hopi atencion y ta sigura su mes cu e mucha muhe ta namora di dje y ta confi’e completamente.

Despues e ta purba haci e mucha muhe dependiente di dje. Por ehempel, pone e mucha muhe pleita cu su miho amiganan y su mayornan. Unabes e mucha muhe pleita cu su amiganan y su mayornan, e ta sigura su mes cu ta cu ne so e mucha muhe por papia y trata.

E ora e ta purba laga e mucha muhe haci cos cu realmente e no kier haci. Por ehempel, e ta laga e mucha muhe fia placa of busca un telefon na su nomber, mientras cu ta e ta esun cu ta uz’e. Of e ta convence e mucha muhe pa tene relacion sexual cu su amigonan. Asina e mucha muhe mester demostra cu e ta stim’e di berdad.

Si e mucha muhe tene relacion sexual cu su amigonan, e paso pa haci sex cu otro hende, a cambio di pago, ta hopi chikito. Prome cu e mucha muhe sa, ya e ta haciendo trabou di prostitucion.