Best Dad Ever!

Un bon educacion cualitativo ta importante pa e creacion di un ciudadano vital. Desafortunadamente, e yiunan no ta nace cu un manual na unda e mayor ta haya instruccion con pa lanta nan. Ademas di e mayornan, e organisacionnan mester asumi responsabilidad y yuda e mayornan cu educacion di nan yiunan. P’esey, Fundacion Telefon pa Hubentud Aruba, a desaroya e programa; ‘Best dad Ever’!

‘Best dad Ever’! ta un programa cu ta purba stimula envolvimento di e tata den cuido y educacion di e yiunan. Durante dies sesion, e tata/futuro tata ta bira consciente, a traves di diferente modulo, hunto cu su pareha y yiunan, con e por ta mas envolvi den cuido y criansa di e yiunan. Door di e definicion social y cultural cu ta defini e concepto di hombresa y door di siña y implementa tecnica di educacion y cuido den educacion di e yiunan, hopi topico importante ta sali na cla. Na final di cada sesion e tatanan ta ricibi tarea cu mester haci na cas.

Cada sesion tin su propio tema y proposito. Embaraso, nacemento, planea famia, cuido, genero, violencia domestico, necesidad y derecho di e mucha y reparticion di tarea, ta algun di e temanan cu ta discuti riba nan.

E meta final di, ‘Best dad Ever’!ta pa trece cambio den e manera di pensa di e (futuro) tatanan tocante nan envolvimento den educacion y cuido di nan yiunan.