**Termento (Bullying)**

Na Telefon pa Hubentud nos ta ricibi hopi pregunta di hoben cu ta yama tocante termento (bullying). E ta un problema cu ta causa hopi problema rond mundo. Tambe na Aruba termento (bullying) ta presente na scol, club deportivo, entre ‘amigo’, den vecindario y te hasta na cas. Nos, na Fundacion Telefon pa Hubentud Aruba, kier bisa bo cu bo no ta bo so!!

Termento (bullying) ta un di e charlanan mas frecuentemente pidi na Telefon pa Hubentud Aruba. Telefon pa Hubentud Aruba, ta traha hunto cu ‘Child helpline International’ (Liña Internacional di ayudo pa Mucha), pa combati e problema.

Tin 4 diferente forma di termento: fisico, verbal, emocional y cibernetico. Tur e formanan aki por causa hopi dolor cerca esun cu nan ta ter, pero tambe cerca e muchanan cu ta wak esaki pasa. Niun hende ta gusta bay un caminda unda no ta safe y cu tin termento.

Termento ta un forma di violencia y p’esey mester atac’e,
Termento no ta stop si bo ignor’e,
Termento semper ta laga herida den e bida di esun cu nan ta ter.

Ta p’esey nos ta ataca termento cu hopi seriedad.

Purba di t’ey pa otro. Ora nan ta ter un hende, conta un persona cu, no solamente por yuda esun cu nan ta ter, pero esun mes cu ta ter.

Ta bon pa sa cu si nan ta ter bo, bo no ta bo so. Por ta, ta parce cu niun hende den bo klas of na cas lo por yuda bo. Tin biaha bo ta sinti bo mes so y lubida. Pero nunca lubida cu si bo papia di e problema, semper lo tin un hende cu por y kier yuda bo. No rindi door di keda keto. Cambia e situacion door di papia tocante e asunto cu un adulto, of cu un otro mucha cu por sostene bo. Tampoco, nunca lubida cu bo no ta straño of bobo of fastioso, ta esun cu ta ter ta esun cu tin un problema den su curason y den su mente.