Presion di grupo

Hunto cu ‘Child helpline International’ (Liña Internacional di ayudo pa Mucha), Telefon pa Hubentud, ta traha riba e tendencia di ‘peer pressure’ (presion di grupo). Forma parti di ‘peer pressure’ (presion di grupo), ta algo humano. Tin dos tipo di presion di grupo. E presion di grupo negativo y e presion positivo. Si bo wak un grupo di deporte of di baile, e presion positivo ta esun cu ta pusha e grupo aki pa bay dilanti. Con bo ta forma un grupo di amigo positivo cu t’ey pa otro na un forma stimulante? Hopi biaha bo ta siña esaki door di purba y faya. Ta dificil pa sali for di un grupo di amigo, pasobra lo bo topa nan tur caminda riba e isla chikito aki. Tampoco bo no kier ta bo so sin amigo. Den un situacion asina ta importante pa bo sa, cu cerca un bon amigo bo por ta bo mes. Bo no mester haci nada cu bo no kier den un grupo di bon amigo.

• Nos tur ta topa cu presion di amigo den nos bida. Ta importante pa sa con pa anda cu esaki,
• Nos ta enfoca riba presion di amigo di un banda positivo pa stimula e comportacion positivo
• Door di enfoca riba e banda positivo, esun cu ta haci esaki positivamente ta pone un spotlight riba dje y e ta haya e sosten den su bon forma di biba.

Presion di grupo ta algo cu bo mester siña biba cu ne, aunke bo ta un adulto na trabou, na un club deportivo of te hasta ora bo cana riba caya, bo lo topa cu esaki. Comportacion di grupo tambe por cay bou presion y bira dificil pa stop. Si bo por bira consciente di loke ta pasando, ya caba ta un paso grandi. Despues lo bo mester tuma e paso. Mayoria biaha si bo duna bo opinion of mustra cu bo no ta di acuerdo cu algo, otro lo sigui bo. E ora abo, door di bo accion, lo bira un lider positivo.

No lubida nunca: ta mihor forma parti di un grupo chikito positivo cu un grupo grandi negativo.