Sugar daddy/mommy

Mas y mas ta uza e terminologia sugar daddy/mommy den sociedad. Pero kico esaki ta nifica di berdad?

Sugar daddy/mommy no ta di awo so. E tabata t’ey pa hopi tempo caba. Ta trata di un homber/ y/of hende muhe di edad cu tin placa y un mucha muhe of mucha homber hoben (den necesidad), cu mester placa y cu ta drenta den un sorto di relacion. Un homber/muhe di edad cu ta financieramente generoso cu e muhe/homber hoben.

Biahe, bishita restaurant, cumpra paña, paga huur, financia estudio y/of un contribucion financiero mensual e sugar daddy/mommy por ofrece, pa asina e por ta den compania di e mucha muhe/homber hoben.

E mucha muhe/homber hoben cu ta entrega su compania a cambio di sosten financiero, yama sugar baby. Tin biaha, realmente, e unico cos cu e sugar baby (hoben den necesidad) kier, ta pa e sugar daddy/mommy pone cuminda y cos basico na cas. No ta cuestion di con rico e sugar daddy/mommy ta, pero con pober e sugar baby ta. E hoben den necesidad, mayoria biaha, djis kier ofrece su compania na e sugar daddy/mommy.

No obstante, comunidad ta mira e sugar daddy/mommy como algo negativo y un comportacion inmoral. Esaki por tin mas di haci cu e relacion di homber/muhe di edad cu mucha muhe/homber hoben, cu e placa mes. Ademas, un relacion entre un adulto y un menor ta castigabel pa ley criminal di Aruba. Ta p’esey mayoria relacion di sugar daddy/mommy ta den secreto.