Fundacion Telefon Pa Hubentud Aruba

A lansa e liña di telefon Arubano di ayudo pa hubentud, TELEFON PA HUBENTUD ARUBA, dia 20 di november 1999, como un instancia caritativo independiente, cu e number distingui ‘131’ y e logo, dirigi riba mucha y hoben di 8 pa 24 aña y cu ta duna su servicio di 14:00 pa 18:00, 365 dia pa aña.

E plan pa un liña di telefon di ayudo tabata t’ey caba pa algun tempo, tanto den organisacion priva, como den e maneho di Minister di Asunto Social.

Na 1999 un grupo chikito a bin hunto y a dicidi pa ehecuta e proyecto pa bin cu Telefon pa Hubentud, basa riba informacion acumula, specialmente for di e Liñanan di Ayudo pa Hubentud di Hulanda, cu ya tabata existi pa mas di 20 aña caba y e Liña di Ayudo Corsou, cu tambe tabata existi caba na e momento ey. E gran diferencia entre e Liñanan di Ayudo aki den Reino Hulandes tabata, cu Telefon pa Hubentud a cuminsa cu e experimento di inclui hoben adulto (teenagers) den e grupo di mentor boluntario. Un experimento cu a resulta di tabata uno exitoso.

Telefon pa Hubentud ta reconoci riba plataforma nacional y internacional. Pa cuminsa a ricibi un subsidio di ‘Juliana WelzijnFonds’ y  ‘Kinder en Jeugd Postzegel Fonds’, tur dos organisacion ta estableci na Hulanda. Desde 2004 Telefon pa Hubentud ta miembro tambe di ‘Child Helpline International’. Telefon pa Hubentud tin un protocol di cooperacion firma cu Ministerio di Telecomunicacion, Educacion y Asunto Social di Aruba. Desde november 2002, e mucha por yama ‘131’ gratis. Ademas di uza e servicio di telefon pa contact Telefon pa Hubentud, e mucha y e hoben tambe por e-mail of ‘chat’ cu nos riba nos APP mobil 131.

Telefon pa Hubentud ta un forma facil pa duna asistencia na hoben, cu na un momento particular ta experencia problema. Dependiendo di e contenido di un combersacion, e servicio di Telefon pa Hubentud, por tin e siguiente funcionnan:

  • Prevencion primario: preveni problema dunando sosten na esun cu a yama pa atende cu su
  • Prevencion secundario: reconoce un problema menasante y sostene esun cu ta yama pa yuda haya un solucion.
  • Prevencion di tercero: preveni cu esun cu ta yama sigui experencia resultado negativo di un problema. Hopi biaha esaki ta resulta den referencia na un ayudo specialisa.

Ta mas cu claro cu e telefon, e-mail y chat aki, ta e manera cu e mucha por pidi ayudo directamente, mientras ningun otro instancia di proteccion di mucha ta accesibel pa nan. Fuera di telefon, e-mail y conseho via chat, Telefon pa Hubentud, tin tambe un ‘funcion di indicado’, encuanto e factornan cu ta causante di e problema cu tin scondi tras di e problema social di e mucha y e hoben. Alabes pa desaroya y stimula proyecto y programa cu ta dirigi na preveni y atende cu e problemanan aki. Pa funcion di e indicado y e polisa aki, Telefon pa Hubentud, ta mantene como su grupo meta: Sociedad completo.

Telefon pa Hubentud ta un organisacion caritativo y e unico dos personanan cu ta ricibi un salario ta e Director y un trahado psicosocial. Nos Fundacion ta depende di e fondonan cu ta ricibi di donacion y un suma chikito di subsidio for di Gobierno. Pa por ehecuta e proyectonan cu ta planea, Telefon pa Hubentud, semper ta en busca di sponsor.

 

Proyecto

 

Nos personal ta bishita scol rond Aruba pa duna presentacion tocante e trabou di Telefon pa Hubentud, ta ricibi invitacion pa organisa tayer, lectura y ta traha proyecto tocante e topiconan manera termento, divorcio, sexualidad y otro topiconan mas. E personal tambe ta duna tayer na docente y lider di cuido di mucha y otro profesionalnan tocante e topiconan cu ta regarda problema cu e mucha/hoben ta topa cu ne den su bida diario. Telefon pa Hubentud ta produci un variedad di relato, pamfleta y documento informativo, poster y paki di informacion general, diseña pa lanta e conscientisacion di e problemanan specifico y cu ta encera conseho con pa atende cu nan. Telefon pa Hubentud no ta djis scucha e muchanan – nos ta duna nan tambe un bos door di campaña tocante di topico importante cu ta afecta nan bienestar y nan derechonan.

Riba 20 di november, Dia Internacional di Derecho di Mucha, Telefon pa Hubentud semper ta presenta un proyecto nobo cu e topico, cual ta selecta a base di e yamadanan telefonico, e-mail y combersacion via chat, cu nos ta haya di mucha y hoben. Nos prome proyecto tabata ‘Termento’, pasobra asina hopi mucha a papia di esaki. Ataca e problema di termento a bira un parti central di e trabou di Telefon pa Hubentud. Den un afan pa promove e plannan contra termento cu realmente ta funciona, a lansa un campaña grandi na 2000 pa expande e bon comportacion na scol. Telefon pa Hubentud a produci foyeto di instruccion pa maestro, alumno y mayor, poster y informacion di cifra real. Despues cu a duna diferente charla na scol, mayoria di nan a incorpora e topico aki den nan les social. Na 2014, Telefon pa Hubentud, a bolbe lansa un proyecto contra termento yama, ‘Prevencion di Termento na Scol’. Divorcio, derecho di mucha, habilidad di comunicacion, sexualidad, codigo di conducta den deporte, proteccion online y no violencia, tabata otro topiconan cu Telefon pa Hubentud a presenta como proyecto.

 

Nos Mision

 

Nos mentornan ta dirigi riba capacitacion di e mucha y e hoben – cu informacion, cu escogencia y cu sosten emocional; pa nan haya confiansa den nan mes y pa sigura nan cu nan no ta nan so. Telefon pa Hubentud ta efectivo pasobra mucha y hoben sa cu ‘131’ ta di nan. E mucha no mester pidi permiso di un mayor prome cu  e yama. Tampoco no tin lista di espera, e telefon ta duna nan e privacidad y e escogencia di con largo nan kier papia. Nan ta den control y nos ta kere cu ta p’esey asina hopi hende hoben ta yama nos tur dia.

E mentornan di Telefon pa Hubentud ta curasha e mucha pa comparti su problema cu un adulto cu e ta confia. Pa mucha cu ta biba den un cas problematico, esaki no semper mester ta un mayor – e por ta un otro famia, un docente, un amigo di cas of un bisiña. Pero hopi biaha, despues di a papia cu un di nos mentornan, e hoben ta realisa cu e mayor no kier nada otro cu scucha su problemanan y yuda den soluciona esakinan.

Ta registra, tur yamada telefonico, e-mail y combersacion di chat cu ta anonimo.

 

 

Staf

 

E staf ta consisti di un Director y un trahado social, cu ta esunnan cu ta encarga cu dunamento di charla, tayer, proyecto y tambe nan ta representante di Telefon pa Hubentud. E Staf ta disponibel durante oranan di oficina.

Chat Anonimo

Bo privacidad y anonimidad ta sigura ora bo usa nos app

Den Un Click Bo Por Yama 131

Get in touch cu nos rapido
cu un solo click

Email Anonimo

Si e chat no ta disponibel, bo por manda nos un email anonimo

Personalisa Bo Avatar

Traha bo mesun Avatar pa match bo personalidad y estilo

Mustra Humor cu un Emoji

Demostra con bo ta sinti uzando un di e emojisnan disponibel

Disponibel Tur Dia 2pm - 6pm

E chat via nos app ta disponibel tur dia na e orario stipula ariba

Contacta Nos

Manda nos un mensahe

Pa mas informacion over di tajernan of informacion bo por jama Telefoon pa Hubentud durante orarionan di oficina

Oranjestad, Aruba

Partners