Fundacion Telefon Pa Hubentud Aruba

Directiva

E Directiva ta na encargo di planificacion cu Fundacion Telefon pa Hubentud Aruba lo sigui pa e añanan venidero. Nan tin bista tambe di e trabounan di e empleadonan pa sigura cu ta logra e metanan stipula den e plan. E Directiva ta consisti di boluntario.

Conseho Hubenil

Fundacion Telefon Aruba pa Hubentud ta pa mucha y hoben. Esaki kiermen cu participacion di hoben den e Fundacion ta importante. Pa logra esaki, Fundacion Telefon pa Hubentud Aruba, kier stimula e participacion di e hobennan, ainda mas, door di bin cu un conseho hubenil. Door di involucra hoben den e trabou aki, Fundacion Telefon pa Hubentud Aruba, lo haya un miho bista di locual cu ta pasando entre e muchanan y e hobennan na Aruba. E Conseho Hubenil, na nomber di Fundacion Telefon pa Hubentud Aruba, ta trata cu conseho pidi of no pidi.
Nan tin un contribucion importante cu cambio mayor y/of desaroyo y contribucion pa e obhetivo y e proyectonan di Fundacion Telefon pa Hubentud Aruba, cu ta andando.

E Conseho Hubenil di Fundacion Telefon pa Hubentud Aruba ta aspira pa: tin algo di bisa y tin influencia riba proyecto hubenil cu mester ser ehecuta y ta conseha Fundacion Telefon pa Hubentud Aruba riba topiconan relaciona cu hubentud. Su miembronan ta bon informa tocante asuntonan relaciona cu hubentud, desaroyo den cuido di hoben na Aruba,
condicion di biba di mucha y hoben na Aruba, e cumplimento di derecho di mucha na Aruba, mision, vision y obhetivo di Fundacion Telefon pa Hubentud Aruba y e funcionamento di Fundacion Telefon pa Hubentud Aruba.

Mentor

Tur dia ta destrui infancia door di abuso y kibramento di confiansa. E mentornan di Fundacion Telefon pa Hubentud Aruba, mas di 30, ta purba di bolbe trece e confiansa aki y ta yuda e mucha/hoben haya speransa. E mentornan di Fundacion Telefon pa Hubentud Aruba ta hende comun cu ta haci un trabou extraordinario – den nan tempo liber. Nos mentornan ta haya entrenamento intensivo durante un periodo di seis siman. Cada sesion ta trata un area nobo di conseho y ta explora topico particular. Fundacion Telefon pa Hubentud Aruba su proceso di screen, selecta y train ta rigoroso. E mentor ta traha un shift di dos ora. Semper tin un supervisor disponibel pa yuda e mentor cu por tin mester di un sesion pa discuti despues, pa yuda e mentor laga atras cualkier sintimento di angustia of preocupacion provoca pa e yamadanan cu el a ricibi y pa dun’e guia y sosten.

Staf

E Staf ta consisti di un Director y un trahado social. Nan ta esunnan encarga pa duna charla, tayer y proyecto y nan mes ta representante di Fundacion Telefon pa Hubentud Aruba. Nan ta esunnan tambe cu ta train y sostene e boluntarionan. E directiva ta disponibel durante ora di trabou.